«Бірыңғай жинақтаушы зейнетақы қоры» АҚ 2018 жылдың 1 қазанынан бастап Ембі қаласы мен Жезкент кентіндегі қызмет көрсету орталықтарының жабылатындығын хабарлайды.

Жақын жердегі қызмет көрсету пункттері мына мекенжайларда орналасқан: 

• Қандыағаш қ., Молодежный шағын ауданы, 16/А (Ембі қ. тұрғындары үшін);
• Бородулиха ауылы, Тәуелсіздік көшесі, 73 (Жезкент кентінің тұрғындары үшін).

Қор бизнес-үдерістерге түзету енгізу және шығындарды оңтайландыру үшін алдын алу шараларын қабылдау мақсатында жыл сайын Қордың қызмет көрсету орталықтары бойынша орташа жылдық жүктемеге талдау жасайды.

2018 жылдың қаңтар-мамыр айлары аралығында жүргізілген талдау нәтижесі бойынша салымшылар (алушылар) аз келетін қызмет көрсету орталықтары айқындалды. 

Қызмет көрсету орталықтарына түсетін жүктеме Қордың сервистерді жақсартуына және ақпараттық-коммуникациялық қызметтердің жаңа түрлерін енгізуіне байланысты азайып жатыр. 

Бүгінде көрсетілетін қызметтерге бірдей қолжетімділікті қамтамасыз ету үшін Қордың веб-сайтында (www.enpf.kz) салымшылар мен алушылар тарапынан айрықша сұранысқа ие қызметтердің барлығы электрондық форматта жүзеге асырылған. Олардың ішінде:    

• Зейнетақы шотын ашу жөнінде өтініш беру;
• Зейнетақы шотынан үзінді-көшірмені электрондық поштамен алу;
• Жеке деректемелерге өзгерістер мен толықтырулар енгізу;
• Зейнетақы төлемдерін тағайындау жөнінде өтініш беру;
• Төлемдерді тағайындау және (немесе) аударым жасау жөніндегі өтініштің мәртебесін (орындалу барысын) қадағалау;
• Зейнетақы калькуляторы бойынша болашақ зейнетақыны болжамды түрде есептеу қызметтері бар.

Қор көшпелі қызмет көрсету сервисін белсенді түрде дамытып жатыр.

Оған халықтың әлеуметтік тұрғыдан осал топтары, сонымен қатар бүкіл ұжымға қызмет көрсету және оларға ақпарат беру-түсіндіру жұмыстарын жүргізу үшін кәсіпорындар мен ұйымдардың өкілдері өтінім бере алады. Айта кетелік, өтінімді Қордың веб-сайты арқылы да жолдауға болады.

Қор 2019 жылы «Мобильдік кеңсе» жобасы арқылы көшпелі қызмет көрсетуді  одан әрі жүзеге асыратын болады. Бұдан басқа «БЖЗҚ» АҚ және «Қазпошта» АҚ арасында ынтымақтастық туралы Меморандумға қол қойылды. Соған сәйкес жақын уақытта салымшылар мен алушыларға Қазпошта бөлімшелері арқылы Қор қызметтерін алу мүмкіндігі беріледі.    

Қазіргі уақытта «БЖЗҚ» АҚ «Азаматтарға арналған үкімет» мемлекеттік корпорациясымен бірлесе отырып, төлемдер бойынша композиттік қызметті – төлемдерге қатысты ортақ өтінішті «Азаматтарға арналған үкімет» мемлекеттік корпорациясы (халыққа қызмет көрсету орталықтары) арқылы ұсыну қызметін енгізуді қарастырып жатыр.