Жаңалықтар

«Нұр Отан» қоғамдық саяси партиясының институтында «Зерде» экономикалық клубының мәжілісі өтті, онда Қазақстан Республикасы зейнетақы жүйесінің ағымдағы жай-күйі, проблемалары мен болашағы жөнінде тақырып қозғалды.

Мәжіліске Қазақстан Республикасы Мәжілісінің депутаттары, мемлекеттік органдардың өкілдері, «Зерде» клубының тұрақты қатысушылары – қазақстандық сарапшылар, «БЖЗҚ» АҚ Басқармасының Төрағасы Ерденаев Руслан Серікұлы бастаған «БЖЗҚ» АҚ басшылығы қатысты.  

Жиналған қауым БЖЗҚ Басқармасы Төрағасының сөйлеген сөзін қызығушылық таныта отырып тыңдады, Төраға зейнетақы жүйесінің, Қор қызметінің қазіргі жай-күйі жөнінде толық есеп бере отырып, Қорды құрудың артықшылықтары мен даму болашағын атап өтумен қатар, зейнетақы жүйесінің дұрыс жұмыс істеуі, осыған орай қазақстандықтарды зейнеттегі жағдайын тиісінше қамтамасыз ету жайында сөз қозғады.  

2015 жылдың қорытындысы туралы да айтылды. Мәселен, 2016 жылғы 1 қаңтарда салымшылардың зейнетақы жинақтары 5.8. трлн. теңге (01.04.2016 жылға – 6.06 трлн. теңге) болды, ал сол кезде 2015 жылғы кірістілік 15,65% болған. Жыл сайынғы өсім қарқыны 21% деңгейінде сақталып отыр. 2015 жылдың қорытындысы бойынша зейнетақы жинақтарының көлемі ЖІӨ-нің 14,30%-ын құрады.

БЖЗҚ-ны құру артықшылықтарының ішінде еліміздің зейнетақы жүйесін дамытудың жаңа бағыттарын қалыптастыруға және қажет болғанда түзету шараларын уақтылы енгізуге мүмкіндік беретін параметрлік деректерге мониторинг және талдауды жоғары деңгейде жүргізуге жағдай туғызатын салымшылардың бірыңғай базасының құрылуы ерекше аталып өтті.  

БЖЗҚ-ның күн сайын салымшылардың жеке зейнетақы шоттарына инвестициялық табысты жинақтар сомасына сәйкес бөлетіні туралы ақпарат берілді. 2016 жылдың басынан бастап 139,04  млрд. теңге мөлшерінде таза инвестициялық табыс алынды.

«Бүгінде бүкіл әлем, сонымен бірге Қазақстан елі де қызметтерді сапалы көрсетіп қана қоймай, жалпы алғанда қазіргі заман адамдарының өмірі мен жұмысын жеңілдететін қызмет көрсетудің электрондық түріне бағдар алған, оның ішінде БЖЗҚ да бар. Салымшының электрондық форматта өз жинақтары туралы қажетті ақпарат алу мүмкіндігі болуы үшін барлық жағдай жасалып жатыр. Бүгіннің өзінде салымшылардың жалпы санының 17%-ы электрондық хабарлау тәсілін пайдаланады. Бұл 2017 жылдың соңына қарай 30 %-ға дейін өсуі мүмкін. БЖЗҚ мамандары құпия ақпараттың қорғалуын қамтамасыз ете отырып, халыққа электрондық қызмет көрсетуді дамытуға барынша күш салып жатыр» деді Басқарма Төрағасы Ерденаев Руслан.        

Сондай-ақ мәжіліс барысында зейнетақы активтерін инвестициялаудың негізгі қағидаттары мен оны жетілдіру шаралары айтылды. Мысалы, БЖЗҚ-ның ұсынысы бойынша салымшы ұсынылған инвестициялау стратегияларының бірін таңдауға тікелей қатысуға құқылы болуға тиіс.